Стоглавый собор (Стоглав), Правило 54

О том же святительском суде от священных правил святых апостол. Втораго правила. Толк. Глава 54

Божественная писания и священная правила и законы не повелевают мирским судьям судити священников и прочих причетников и иноков, но вся священная мужи и прочия вся церкви, большая же и молитвенныя храмы и сих область и господства все и владычество и управление попеченое, местным епископом повелевают имети. И аще причетник с причетником прю имать: да не оставляет своего епископа и на мирская судища да не приходит, но да судит их епископ или в себе место кому прикажет сих судити. Такоже и иноцы и прочий церковнии людие: да судит их епископ их или в себе место повелит кому судити их. Аще ли причетник прю имать с своим или с инем епископом, да судит их митрополит тоя области своими епископы собором. Аще ли причетник или епископ прю имать с митрополитом, патриарх их судит; и митрополит убо в своей области под собою имать епископы и сих собирает, и поставляет, и управляет.

Епископы же в своих пределех под собою имеют вся церкви и монастыри, и иноки, и причетники, и сих собирают. Мирстии же властели всех чины и власти прираэящейся, ссужаются в сем веце и в будущем, якоже писано есть в заповедех святых апостол, яко восхищен недарованная им раздражают бога, якоже Дафан и Авирон, и Корей, и их сыново советницы, и Озия царь. Страшно убо и бедно есть мирским человеком ко священным вещем прикасатися; но ни дьякону убо приносили жертвы несть достойно, ни крестити кого, ни благословения, мала и велика сотворити; такоже ни пресвитеру несть достойно наставления творити и развращати чин священнический, яко дерзнувшей на таковая не с нами борются, но с великим архиереом Х.ристом. Аще бо Филипп скопца крестил, и Анания мене Павла, но не сама собе восхитиста святительского сана, но от бога прияста власть от несочетаннаго архиерея. Мирским же наипаче не подобает к священным чином и властем, и степенем и причтом прикасатися или судити сих и управляти. Аще и согрешит от сих кто, от бога истязан будет, и паки в тех же апостольских заповедех глаголет, яко кождо в даннем ему чину да пребывает, и не преступайте заповедей, не суть бо наша, но божия, яко рече господь: «Слушаяй вас мене слушает, и слушаяй мене слушает пославшаго мя; и отмотайся вас, мене отметается; отметаяйжеся мене, отметается пославшаго мя».