Стоглавый собор (Стоглав), Правило 69

О венечной пошлине царев указ и соборное уложение. Глава 69

Венечную пошлину заказывают и собирают священники, старосты поповские и священники десяцкие в митрополии и во архиепископьях, и в епископьях, по всем городом, и по десетинам, и по селам, а емлют с первого браку алтын, а со втораго браку два алтына, а с трехженцев по четыре алтына по цареву указу, да те денги, собрав, отдают святителем в казну с земскими старосты и целовальники, которые с ними у святительских бояр и у десетинников в суде сидят, с данию вместе и с десетинничьею и с заещиковою пошлиною на рождество Христово или на Збор сполна по книгам. А по соборным церквам протопопы и священники емлют свою венечную пошлину потому же. Да те же попопские старосты и священники десяцкие о том берегут накрепко, чтобы тое венечные пошлины не таили, сколько которой поп по своим церквам свадеб венчает и молитв говорит, отдавали сполна. А которой поп от тех венечных пошлин утаит и обличен будет, и оне на том емлют промыту по цареву судебнику по два рубля и по четыре алтына и по полуторе денге, да те денги отдают с данию же вместе во святительские казны казначеем. Да тем же священником, поповским старостам и священником десяцким избирали добрых священников, богорадных и искусных, которым те знамена о венечной пошлине давати, и писали бы к ним в тех знаменах именно: чтобы женилися ни в кумовстве, ни в сватовстве, ни в роду, ни в племяни, да о том бы обыскивали накрепко, елико, их сила; а четвертый бы брак никогдаже не именовался, и молитвы не говорили. И о том бы им запрещали и наказывали накрепко, чтобы наложниц не держали и содомския скверныя дела нигде не именовалися, жили бы православные крестьяне с своими женами по закону хрестьянскому и по священным правилом, якоже подобает православным крестьянам жити и пребывати во всяком благочестии и чистоте. Да тем же священником, поповским старостам и священником десяцким и пятидесяцким по всем святым церквам во градех и по селом бречи и назирати о церковном пении у о священническом чину о всем по божественному уставу и по «душенным правилом, чтобы священники и дьяконы сами жили по священству, в чистоте и в покаянии, и во прочих добродетедех, и от пиянственнаго пития воздержалися, и в пьянство бы це упивалися; и церковное бы пение и правило по всем святым церквам было сполна по уставу, чинно и немятежно, о всем по преданию святых апостол и святых отец, и по священным правилом, ничтоже претворяюще. Да и детей бы своих духовных всех православных хрестьян поучали страху божию, чтобы к церквам божиим ходили, и ко отцем своим духовным на покаяние приходили и с женами, и с детми, и на божественном бы пении стояли со страхом и трепетом, и со всяким духовным вниманием богу моляся, кождо о своем согрешении, а повестей бы и излишних мирских бесед в церкви стоя не говорили. А которые священники и дьяконы учнут упиватися в пиянство и о церквах божиих и о божественном пении учнут небречи: с тем священником, старостам, и священником десяцким, им говорити накрепко, чтобы noкaялиcя и в пьянство не упивалися, и от своих злых обычай престали, да не соблазн мирским людем от них будет по реченному: «Горе миру от соблазн». И паки рече: «Смущаяй грех да понесет», и о церковных бы о всех чинех брегли, елика их сила о всем по преданию святых апостол и святых отец. А не учнут слушати поповских старост и священников десяцких, и им о том писати ко святителем. И тем безчинным попом и дьяконом быти от святителей в великом запрещении и в конечном извержении, о всем по священным правилом. Да тем же священником, старостам поповским и священником десяцким у всех попов и у дьяконов дозирати ставленых и благословеных, и отпустных грамот, и перехожих по селом в кою пору дань збирают. И у которых попов и у дьяконов не будет ставленых и благословеных, и отпустных грамот, и им тем попом и дьяконом служити не велети, да тех попов и дьяконов посылают ко святителем за порукою. А в котором граде новодесятинник наедет, и тем всем попом и дьяконом того града, опричь сельских попов и дьяконов, свои жалованые грамоты и ставленые, и благословенью, и отпустные десетиннику старостами, и целовалъники, которые у десятинников в суде сидят. А пошлины с них не дают. А у которых попов и у дьяконов ставленых и отпустных не будет, и десятинником тех попов и дьяконов отсылати к святителем за порукою. А которые попы и дьяконы новопоставлены или от церкви к Церкве прейдут, и они свои грамоты десятинником являют и перехожие гривны платят по старине перед теми же старостами.

А десятинники к собе грамот у них не емлют, смотрив да им отдают назад часа того, перед теми же старостами и священники. А у сельских попов и у дьяконов десетинники грамот не дозирают, потому «что десяцкие священники и старосты Земские грамот дозирают, которые дань берут. А у которых грамоты не подписаны или отпустные у которого не будет, и оне срочат ко святителем, а к. десятинником о том не ездят. А которые новопришли или новостали, и заещики на них емлют перехожие гривны, да отдают десятинником. А на болшая утверждения всем святителем, митрополиту и архиепископом, и епископом посылати дозирати с духовным поучением к попом и дьяконом и ко всем православным хрестьяном по всем градом и по селом, коемуждо во своем пределе, соборных священников, добрых и искусных, могущих и иных в духовных пользовати, чтобы церковные чины и божественное пение по всем святым церквам о всем бы было по преданию святых апостол и святых отец, по божественному уставу и по священным правилом, ничтоже претворяюще. Да святителем же посылати по всем градом и по селом свои грамоты, в котором граде будут архимариты и игумены, и протопопы, коемуждо во своем пределе, чтобы те архимариты и игумены, и протопопы надзирали и досматривали над поповскими старостами, и десяцкими, и надо всеми священники и дьяконы, чтобы жили по священству, и от пиянственнаго пития воздержалися и в конец не упивалися, и от церквах божиих и о церковном пении брегли, о всем по преданию святых апостол и святых отец. А которые священники, поповские старосты и десяцкие, и прочие священницы не учнут беречи о церковных чинех и архимаритов, и игуменов, и протопопов слушати, и им о том о всем писати к святителем; и тем поповским старостам и десяцким священником быти от святителей в великом запрещении по священным правилом. А из которых градов и из сел в митрополии и во архиепископьях, и епископьях учнут приходити к святителем жалобники о духовных делех и о всяких обидах, и о управах земских по рядным 4 и по духовным грамотам, и по кабалам в займех, и в поклажах, и во всяких делех, опричь душегубства и разбоя с пошлиным, и святители повелевают своим бояром и десетинником давати им в тех делех приставов, и они по них ездят с приставными. А в приставной пишут быти по цареву Судебнику, а срок им чинят по царевым грамотам, как в них писано. А митрополичим недельщиком на Москве и по всем градом в митрополии и от десетинников по десетинам и по селом ездити с приставными грамотами на правду и на обыск о всяких делех от жалобников саму другу, а в дальние места саму третью. А давати на поруки попов и дьяконов и все причты церковные перед десяцкими священники; а без десяцких священников на поруки им не давати. А по мирских людей во всяких делех от жалобников ездити им с приставными и на правду и на обыск потому же, а давати их на поруки перед земскими старостами или перед земскими десяцкими; а без земских старост и без десяцких на поруки их не давати, а от поруки поклонного у них не имати. А срочные и обыскные списки во всяких делех у них писати земским дьяком перед теми же старостами и десяцкими или церковным дьяком крепости для и бережения земскаго. А с одновытными по попов и по дьяконов, и по все причты церковные, и по всех людей не ездити и на поруки не давати их. А духовных делех лучится им ехати по кого с записми, и им давати их на поруки перед теми же священники десяцкими и перед земскими старостами и десяцкими. А сроки им чинят перед святители, которой у них в записи написан. А от поруки у них и поклонного не емлют ничего. Такоже всем архиепископом и епископом, коемуждо во своем пределе, потому же устроили, и беречи о том святителем накрепко, чтобы от их людей вперед продажи однолично не было. А на которого недельщика придут жалобники, и о том обыскав, без суда доправити втрое по цареву Судебнику. А бояром и дворецким, и десетинником имати с судных дел гривенная пошлина по цареву судебнику о всем. А лишка посулов бояром и дворецким, и десятинником, и дьяком не имати. А которой боярин или дворецкой, или десятинник, или дьяк через Судебник лишнее и посулов возмет: и о том обыскав без суда теми же старостами и священники, которые с ними в суде сидят, и иными добрыми людми, да втрое взяти и отдати исцу. А которой боярин или дворецкий, или десетинник, или дьяк вдругие и втретие обличен будет, и на том втрое взяти без суда да отдали исцом; да боярина от боярства и дворецкаго от дворечества изврещи, да и поместья у них отписати, и со очей сослати аки непотребных раб; а у десетинников десетина отняти, а у дьяка дъячество; а взятое на них втрое доправити, да отдали исцом, а их от себя отослати, да и протчии страх приимут таковая не творити. Да митрополиту же и архиепископом и епископом без царева ведома бояр от себя и дворецких не отсылати и в тех место иных не поставляли, кроме прежереченных вин. А у которого святителя изведутся бояре или дворецкие, и им от тех родов изврати, а не будет у них от тех родов, и им от иных родов коемуждо их избирати, да обсылатися с царем; и повелит царь которым быти в боярех или дворецких, и святителем у собя тех и дрьжати, и без царева ведома однолично бояр и дворецких не поставляли. А у которых святителей изведутся бояре и дворецкие, а от тех родов или от иных родов таких у них не будет, которым пригоже в тех место быти в боярех и в дворецких: и им о том бити челом царю, чтобы государь пожаловал, изобрел у собя и дал им которым будет пригоже в том чину быти; а без царева ведома однолично бояр и Дворецких не поставляти; да и дьяков им у себя дрьжати с царева же ведома которым будет пригоже с бояры всякие дела делати, чтобы было брежно. И судили бы в божию правду, а посулов бы однолишно не имали, кроме указных пошлин по Цареву судебнику, и о том святителем над своими бояры и Дворецкими и дьяки бречи накрепко, чтобы у них суд был праведен безо всякие хитрости и коварства, и лихоимства всякого, и продажи, и волокиты безмерные. А тиуном и недельщиком митрополичим и архиепископлим и епископлим с ябедники и с блудницами зговору не чинити, и по зговору священнического и иноческого чину и всех православных крестьян не пpoдaвaти. А которым будет мужним женам и вдовицам и девицам силы искати на священническом и иноческом чину и на мирских людех: недельщиком от них на поруки давати перед старостами и перед священники десяцкими, якоже и преди рехом ; а ставити их перед бояры, и бояре о них святителем возвещают, и святители священнический и иноческий чин соборне по священным правилом сами судят или кому повелят от священных; а бояром их в духовных делех не судити. А которые тиуны недельщики, стакався с блудницами и с ябедники, учнут дела составливати и продажу чинити священническому и иноческому чину и всем православным хрестьяном, от порук и от поклонного денги имати или что насильством возьмут, и потом обличени будут многими свидетели, и святители, о том обыскав, известно добрыми свидетели без суда повелевают бояром своим доправливати на них втрое, да исцом отдают по цареву судебнику; а тиуни с тиунства измещутся, а недельщиков от недель оставливают, да из двора таковых высылают вон, да и прочий страх приимут таковая не творити. Да в царствующем же граде Москве, в митрополиче дворе, искони вечная тиунская пошлина ведется, глаголема крестец, не вем како уставися кроме священных правил. Изо всей митрополии и архиепископьи, и епископьи изо всех градов руския митрополии, архимариты и игумены, и протопопы, и священноиноки, и священники, и дьяконы приедет по своей воли своими делы; иные же от них за поруками приедут в духовных делех, овии же за приставом по кабалам и по срочным в боех, и в грабежех, и в прочих различных делех, да живучи на Москве, сходятся на крестец в торгу на Ильинской улице, да наймуются у московских священников по многим святым церквам обедни служити, да о том митрополичю тиуну являются и знамя у него емлют: овии на месяц, инии же на два, друзии же множае, и пошлину ему от того дают на месяц по десети денег, овии же по два алтына. А которые He доложи тиуна начнут служити, и он на них емлет промыты по два рубля, а о том не обыскивает, есть ли у них ставленые и отпустные грамоты или нет, и таковая вся кроме священных правил сотворяются. И отныне, и впредь, которые приезжие архимариты и игумены, и протопопы, и священноиноки, и священники, и дьяконы учнут являтися тиуну и восхотят, наймуючись, служити по святым церквам обедни на Москве, и ему у них ставленых и отпустных, и благословенных грамот досматривати старостами поповскими, и у которых грамоты будут, а приехали за своими делы, бити челом царю и великому князю или митрополиту, или иными делы, а не за поруками ни за приставом, и ни в которой пене, и ему тем знамена давати, и пошлину свою имати по старине. А у которых тех священных грамот ставленых и благословеных, и отпустных не будет, хотя и за своими делы приехали, а не за приставом, ни за поруками и ему тем знамен не давати, потому что у них грамот нет. А которые будет архимариты и игумены, и протопопы, и священноиноки, и священники, дьяконы приехали за поруками в духовных делех и в прочих яелех, а ставленые и благословенью, и отпустные грамоты у них будут, да восхотят на Москве, наймуючися, по святым церквам обедни служити, и ему однолишно таковым знамен не давати, потому что за поруками прехали . А которые утаився, да учнут служити без знамен, а приехали за приставом и за поруками, и потом обличени будут, и ему тех приводити к митрополиту, и таковым быти под запрещением по священным правилом. А учнет тиун таковым знамена давати, которые за приставом и за поруками приехали или у которых ставленых и благословеных, и отпустых грамот не будет, и потом обличени будут, и тому тиуну от митрополита в великой опале, да ис тиунства извержену быти, аки неверному и непотребному рабу.