Стоглавый собор (Стоглав), Правило 13

Ответ от священных правил о жертвеннике и о кутейнике. Глава 13

В божественной службе толковой пишет. Олтарь есть престол божий и образ вифлиомскаго вертепа идеже родися Христос, паки олтарь образ есть вертепа, идеже погребен бысть Христос. Якоже и евангелист рече: и вертеп изсечен в камени ту положиша Исуса. В том бо пожреся Христос и приносе Отцу богу приношение тела своего. Агнец жрется принося в тайную жертву, иже агнец преобрази во Египте Моисеом при вечере, бо кровию агнчею губителя ангела отврати не умерети людем. Сице же при вечере заклася истинный агнец, вземляй грехи мира. Олтаря же малая оба полы разлучения ради праведных и грешных. Жертвенник есть за Голгофу гору на ней же источи кровь свою Христос за спасение всего мира, и в него вносится токмо священныя просвиры и вино и фимиян и божественныя книги и прочая священная, а от простого ничтоже не вносится. Другой пол олтаря кутейник зовется, и в него вносится о здравии коливо и канон и прочая и на самое воскресение Христово пасхи сыр яйца и иные яди, еже хрестьяном повелено ясти. Такоже и по отшедших душах в нем малые понахиды поют, и проносят кутью и канон и прочее брашно, еже церковником на потребу. А вселенские шесть понахид поют соборне среди церкви. Да и прочие соборные понахиды посреди церкви поют.