Стоглавый собор (Стоглав), Правило 90

Ответ о том комуждо подобает свой чин хранити. Глава 90

И того ради подобает архиереем и иреем, и дияконом, и всякому священническому и иноческому чину подобает комуждо свой чин хранити и блюсти, не токмо житие чисто и непорочно, но и делом, и словом, и хожением, и взором, и слухом безо всякого зазору неподобного. И в ризах и во обуищах комуждо свой чин соблюдати. А излишними не украшатися ниже во градех, ниже в домех, ниже на пути в неподобны ризы облачитися и излишняя искати. Аще ли кто от причетник таковая сотворити дерзнет, – да будет под запрещением священных правил святаго вселенского шестого собора 27-го правила. Тамо бы изъявиша не токмо о причетницех, но и о мирских, начен от синеклита и до просителя даже и до самых жен комуждо свой чин имети. Якоже глаголет 27 правило, никтоже от причитаемых в клирос в неподобну ризу да облачится ниже во граде живя, ниже на пути шествуя, но одеяния да носит усвоенная иже в клиросе причетенным. Аще же кто таковое сотворит – на едину неделю да отлучится. Толк. Никтоже от причитаемых во священном в церковном причте в неподобную ризу да облачится ниже во граде пребывая или в коем селени жительствуя, или на пути шествуя, но приличное и усвоенная причетником да носят. И ино одеяние воину, ино одеяние тысящнику, ино пять десятнику, и ино одеяние купцу, и оно златарю, ино железному ковачю, и ино орачю, и ино просителю, и ино женам, якоже им носити и глаголемыя торлопы. Их же обычай имеют и причетницы носити златом и бисером и камением украшены, и cиe неподобно есть, причетником тако украшатися женским одеянием, ниже воинское одеяние носити им. К. омуждо подобает свое одеяние, от тех же и познавается койждо кто есть коего чина. Епископу же, уставляет Павел апостол, целомудру быти и благовейно украшение имети. Такоже и женам во украшение благолепие со благоговением и целомудрием украшати собя, а не плетением злаком и сребром и ризами многоценными. Но по християнскому жительству и учительству господню и святых его ученик всем тшанием и всею мыслию искати вечных благ, ихже уготова бог любящим его. Прочти же к сему и 7-го вселенского собора правило 16. Такоже и всякие игры, и глумы, и позорища всем причетником отречено бысть, по пятъдесятному правилу и 51-му святого вселенского шестого собора. Толк. Обема правилом тем и мирстии человецы християне суще чисто житие имети истязаеми суть. Того ради правило се. Аще кто от них играет или плясание творит, или шпилманит, рекше глумы деет и на видение человеки сбирает и ловитвам прилежит – таковыя отлучает. Причетницы же, аще что от реченных сих вин сотворят – да извергнутся. Правило 69 святых апостол. Аще который епископ или презвитер, или диякон, или чтец, или певец в 40 дний, сиречь в великий пост, не постится и во все лето в среду и в пятки – да извержен будет. Токмо аще не пакостит ему телесная болезнь, немощному бо прощено есть по силе вкушати масла и вина. Аще мирский человек не постится – да отлучится.