Стоглавый собор (Стоглав), Правило 29

О всех протопопех и о соборных и о ружных и о предельных священникех и дьяконех. Глава 29

Во всех святых соборных церквах по всем градом протопопом и священником дьяконом соборным и придельным и ружным попом и диаконом, так же бы по всем святым соборным церквам и в приходех по градом и по селом, здесе в царствующем граде Москве и по всем градом росийского царствия, чтобы о всех о тех церковных чинех брегли протопопы, чтобы соборные священники и дьяконы и придельные и ружные священники к церквам божиим на всяк день приходили ко всякому божественному правилу и стояли бы на божественном правиле со благоговением и со страхом божиим. А протопопов бы чтили и слушали и повиновалися им о бозе во всем безо всякого прекословия, и брегли бы о всех о тех предиреченных церковных чинех заодин, чтобы божественное правило во всех святых соборных церквах и ружных и предельных сполна было по божественному уставу и по преданию святых апостол и святых отец чинно и безмятежно. А которые соборные священники и ружные и предельные священники и дьяконы не учнут протопопов слушати, а учнут упиватися в пьянство и о церковном пении небречи, и протопопом таких соборне наказывати, чтобы в пьянство не упивалися и к церквам божиим ходили, и на божественном пении чинно стояли со всяцем духовным вниманием, а не билися и не лаялися, и не сквернословили и пияни бы в церковь и во святый олтарь не входили, и кровопролития не билися, занеже священныя правила апостольския и отеческия таких всех безчинников отлучают, а биющихся и кровь проливающих не токмо отлучают, но и конечному извержению предают. Якоже пишут во своих правилех: аще кий епископ или презвитер или дьякон бьет верного или неверного, да извержется.

Такоже: аще кий епископ или презвитер или дьякон упивается, или престанет, или да отлучится. И вы бы священных правил боялися, пребывали бы есте во всяком благоговении священническом, да не от вас будет соблазн или смущение мирским человеком. Евангельскому Христову словеси: горе миру от соблазн. И паки рече: смущаяй грех да понесет и прочее. А которые священники и дьяконы по первом и втором наказании протопоповем соборном учнут прекословити и не повиноватися и о церковном чину не учнут бречи, и протопопом о таких безчинникех святителем возвещати, и тем попом и дьяконом от святителей быти в духовном запрещении и от церкви во отлучении по священным правилом. О протопопех. Также и протопопы, которые по соборным церквам сами учнут упиватися или безчинствовати и небречи о соборном церковном чину. И соборным священником о тех протопопех святителем возвещати и тем протопопом святителей потому ж быти в великом запрещении и в конечном отлучении по божественным же и священным правилом.